Bayer Leverkusen manager Xabi Alonso chuan tun season UEFA Europa League khelh mekah Liverpool chu an champion ngei dawn niin a ngai. Reds hian quarter finals an luh theihna tur atan Czech champion Sparta Prague chu 11-2 aggregate laiin an hneh a ni.
Nyon, Switzerland lama draw anneih hnuah Xabi Alonso chuan a club hlui Liverpool chu champion thei tura rinkai ber annih thu a sawi chhuak.
“Ka tan chuan a chiang reng, Europa League-ah hian Liverpool hi rinkai ber anni e.” tiin Xabi Alonso chuan a sawi chhuak.
Liverpool hian quarter final-ah Italian club Atalanta an hmachhawn leh dawn a, April ni 11 khian Anfield-ah first leg khelh a ni ang. Hetihlai hian Bayer Leverkusen lam pawhin Premiere League club West Ham an hmachhawn ve dawn bawk a ni.
Hriat angin Xabi Alonso hian Bundesliga lamah Bayer Leverkusen a chet that pui hle a, inelna hrang hrangah unbeaten run ala neih pui mek a ni. Quarter finals an luh theihna turin Qarabag FK chu aggregate 5-4 a hnehin an lut ve a ni.
Europa League-ah hian Liverpool leh Bayer Leverkusen lo team dang paruk an la dam ve a, chungte chu AC Milan, Roma, Atalanta, West Ham, Benfica leh Marseille te anni. Jurgen Klopp leh a naute hi champion tura rinkai ber pakhat anni mek a, Xabi Alonso leh a naute erawh anni lutuk lo.
Liverpool hian Europa League nomawi vawi 3 an chawi tawh a, an chawi hnuhnung berna chu 2000-01 season khan a ni.
