Pep Guardiola khan darkar thum chhung teh meuh mai, thlem tumin Jude Bellingham a bia!

Manchester City boss Pep Guardiola chuan summer transfer lai khan Real Madrid midfielder Jude Bellingham chu City lama lut turin a thlem a, darkar 3 chhung teh meuh mai a bia niin report in a tarlang.

Hriat angin tun season khelh mekah Jude Bellingham hi a che tha hle a, summer transfer laia player lak luh tha ber pakhat a ni. Real Madrid khan Borussia Dortmund atangin €103 million in an la lut a, inelna hrang hrangah Spanish club lian tan match 31 inlan tawhin goal 20 akhung mai bakah assist vawi 9 a nei tling mek.

Advertisements

Bellingham’an Real Madrid a pan hnuah Real Madrid chu Supercopa de Espana nomawi a chawi pui tawh a, tun dinhmunah La Liga hmahruaitu ni mekin point 7 in an sang fal mek. UEFA Champions League quarter final-ah Premiere League champion Manchester City nen an inhmachhawn ang.

Amaherawhchu, Bellingham kha Los Blancos tan ni lovin, Man City tan a khel teuh hle niin a lang. Cadena Sur lamin an tarlan danin, summer transfer hnuhnung berah khan Pep Guardiola chuan Etihad lamah lak luh a duh hle niin an tarlang.

A duh em avangin City zawm turin a thlem a, darkar thum chhung teh meuh mai an inbiak thu an tarlang bawk. Citizens lam hian Bellingham hi hlawh tha tak offer an duh a, mahse, kum 20 a upa Bellingham chuan Real Madrid a thlang zawkin, kum 6 daih contract a sign ta a ni.

Real Madrid a zawm hnuah Real player pawimawh tak pakhatah a inchhuah a, tunah hian La Liga leh Champions League nomawi chawi thei dinhmunah an ding mek a, Bellingham hi position pahnihnah a khel kawp thei a, midfield leh second striker angin a khel thin a ni.

Man City leh Real Madrid match hi match hmuhnawm tak anih ngei a rinawm a, champion tura rinkai ve ve anni bawk.

Scroll to Top