Real Madrid superstar hlui Ronaldo Nazario chuan Paris Saint-Germain star Kylian Mbappe chu Real Madrid zawm ngei se tih a duh a, Real Madrid a zawm anih chuan Ballon d’Or pawh a dawng ngei dawn niin a sawi.
“Tunah hian official taka an lak luh hun tur kan nghak mek a, mahse, mi zawng zawngin Mbappe hi Madrid-ah an hmu duh a ni. Real Madrid lama a lut anih ngat chuan, a tawp a tawpah Ballon d’Or a dawng ngei ang” tiin Brazilian striker hlui Ronaldo Nazario chuan Mardrid Universal kal tlangin Daily Mail interview-ah a sawi.
Hriat angin tun season khelh mek a zawh hunah Kylian Mbappe leh France club te hi an inthen ve tawh dawn niin a lang a, Real Madrid hian hunrei tawh tak atangin Mbappe hi lak luh an lo tum tawh a, tun summer transfer-ah chuan an la lut ngei dawn niin a lang.
Mbappe hian football-ah hlawhtlinna hrang hrang alo chang tawh a, amaherhawhchu, Ballon d’Or award erawh ala dawng ngailo.
2020 khan UEFA Champions League final a khel a, 2018 khan France tan FIFA World Cup nomawi a chawi bawk. 2022 khan Argentina nen World Cup final-ah intum ve bawk mahse, a tlawm zawkah an tang leh hlauh a ni.
Tunah hian Real Madrid zawm tur anga sawi mek a ni a, summer transfer lo awm turah a zawm thei anih chuan, atan Ballon d’Or dawn theihna chance a sang ve deuh dawn niin Ronaldo Nazario chuan a sawi.
