France legend Robert Pires chuan Zinedine Zidane an Brazil nilova France team enkawl a duh thu a sawichhuak.
2022 FIFA World Cup final a France in Argentina an hnehloh hnu khan Didier Deschamps hi a hna atangin bang nise Zidane an France National Team a enkawl ngei a rinawm. Amaherawhchu 2012 atanga France team la enkawl ngar ngar tu Deschamps chuan Les Blues enkawl turin kum 2026 thleng daih tur contract thar a ziah belh ta zawk.
2020-21 season thleng Real Madrid a enkawl hnuin Zidane hian hna a la nei leh miah lova, Brazil head coach hlui Tite an Brazil enkawl hna a bansan hnuin Zidane chu Neymar leh a thiante enkawl tura rinkai a ni.
Zidane thianpa leh a teammate hlui ni bawk Pires erawh in Zidane an Brazil enkawl a tum loh thu leh France team enkawl a duh thu a sawichhuak thung.
Pires chuan,” Zidane a duh ber chu France team a ni a, amaherawhchu Deschamps an kum 4 dang a la enkawl leh dawn avangin tun dinhmunah chuan a tan France team enkawl chu thil theih a la nilo. A kalkawng a thlak hret a ngai maithei a, club lamah a kal a ngai mahna, chutihrual chuan Zizou han lalut thei tur club an thahnem lem lo” a ti.
Marseille leh Arsenal tan pawha lo khel tawh tu chuan sawi chhunzawmin,” Ka ngaihdan ka sawi ang a, Zizou hian Brazil sawmna chu a hnawl ang. A chhan chu tawng ber hi a harsatna a ni dawn a, team a thil dik lo hriatfiah theih nan tawng thiam a pawimawh. Brazil enkawl hi chu a ngaihven loh tur tak a ni.”
Pires leh Zidane te hi France tan an lo khel dun tawh thin a, 1998 FIFA World Cup leh Euro 2000 te kha an chawi dun nghe nghe a ni. Real Madrid a Zidane thlaktu Carlo Ancelotti chu tun hnai mai khan Brazil nena sawizawm an hlawh hle a, amaherawhchu Italian coach hian Brazil enkawl tumna a neih loh thu leh Real Madrid ah contract a la neih thu a sawi chiang.