Zanin zanlai / naktuk zinglam (March ni 3, 2023) dar 1:30 ah Copa del Rey semfinal 1st leg khelh a ni dawn a, Real Madrid in an khelmual Santiago Bernabeu ah tun season Spanish Super Cup final a an ngam loh Barcelona an lo mikhual ang.
Real Madrid hian semifinal lut turin Quarter final ah Atletico Madrid chu 3-1 in an hneh a, Barcelona lam pawhin 1-0 in Real Sociedad an tukdawl ve bawk. League lamah Real Madrid hi point 52 nen pahnihna ah an awm mek a, Barcelona lam erawh point 59 nen table chung ber an luah chhunzawm zel.
Carlo Ancelotti nau te an form a, an game hnuhnung 5 ah vawi 4 hnehna changin tumkhat an khingpuite an inhnehtawk pui. Xavi nau te erawh an game hnuhnung 5 ah vawi 2 chiah hnehna an chang a, vawi khat draw result nei in vawi 2 an tlawm bawk. Tun hnaia team pahnihte chet dan en in Real Madrid dah chungnun a awl za mah zawk âwm e.
Real leh Barca te an inhmachhawn hnuhnung match nga atangin erawh Barca an chungnung hret zawk a, game thum ah hnehna changin Real lam vawi 2 an chak ve bawk.
Team news: Real Madrid hian hliam avangin Ferlan Mendy leh David Alaba te an chhawr thei dawn lova, Aurelien Tchouameni leh Rodrygo te erawh dam fel tawhin zanin zanlaiah an inlan thei ang.
Barcelona lam atangin Almeria an hnehloh tuma inhliam Polish striker Robert Lewandowski a la dam fel lova, Real Madrid hmachhawn tur squad ah a tel lo. Tin, Pedri leh Ousmane Dembele te pawh malpui hliam avangin la chhawr theih anni rih lo bawk. Ansu Fati erawh a khup hliam dam fel tawh in Copa del Rey 1st leg ah a inlan thei ang.
Barcelona Predicted XI (4-3-3): Ter Stegen; Araujo, Kounde, Christensen, Balde; Kessie, Busquets, De Jong; Raphinha, Ferran, Gavi
Real Madrid Predicted XI (4-3-3): Courtois; Carvajal, Militão, Rüdiger, Nacho; Modric, Camavinga, Kroos; Valverde, Benzema, Vinicius
Copa del Rey semifinal 2nd leg hi April ni 6 zinglam dar 1:30 ah khelh a ni dawn a, Barcelona in an khelmual Camp Nou ah Real Madrid an lo hmachhawn ve thung ang.