Zanin zanlai/ naktuk zinglam (16 March, 2023) ah UEFA Champions League Round of 16 second leg khelh chhunzawm a ni dawn a, Real Madrid chuan an khelmual Santiago Bernabeu ah Liverpool an lo mikhual ang.
Team pahnihte hi first leg ah Anfield a an inhmachhawn tum khan mikhual lam Real Madrid hian 5-2 laiin hnehna an chang a, team pahnihte inbeihna hi la tawp lo mahse 1st leg a an result atanga tehin Real Madrid chu tlang zawk tura ngaih anni.
Team pahnihte hi an inhmachhawn hnuhnung vawi 5 ah Real Madrid lamin vawi 4 ngawt mai hnehna an chang a, tumkhat inhnehtawkin Liverpool hian Los Blancos an hmachhawn hnuhnung vawi nga ah vawi khat tê mah hnehna an chang lo!
Los Blancos hian an game hnuhnung vawi 5 ah vawi 2 hnehna changin vawi 2 draw result an nei a, tumkhat an chaklo bawk. Reds lam pawh hian an game hnuhnung 5 ah vawi hnih tho hnehna chang ve mahse vawihnih an tlawm thung a, vawi khat draw result an nei. Team pahnihte hi an form ber tum a ni hauh lo.
Team News – Real Madrid player zingah Mendy leh Alaba te chuan hliam avangin Liverpool an hmachhawn thei dawn lova, Reds lam pawhin naktuk zanlai hian hliam avangin Thiago leh Diaz te an chhawr thei dawn bik lo.
Predicted Real Madrid XI – Courtois, Carvajal, Militao, Rudiger, Camavinga, Kroos, Tchouameni, Modric, Valverde, Benzema, Vinicius (4-3-3)
Predicted Liverpool XI – Alisson, Arnold, Konate, Van Dijk, Robertson, Henderson, Fabinho, Bajcetic, Nunez, Gakpo, Salah (4-3-3)
Real Madrid defender Eder Militao chuan Liverpool nena an inbeihna a la tawp loh thu a sawi a, Reds defender Trent Alexander Arnold pawhin hnehna chan ngei tuma Madrid khawpui pan an nih thu a sawi ve bawk. First leg result chu engpawhnise minute 90 dang la awm ah Jurgen Klopp leh a nau te’n thil mak an la thlentir thei ve tlat?