Switzerland international Granit Xhaka chuan Arsenal chhuahsana £21.5 million a Geman club Bayer Leverkusen a zawm chhan a sawifiah.
Xhaka hian Emirates Stadium ah season 7 chhung hun a hmang hman a, manager leh fans te nen ngei pawhin an inkar boruak a fuh vak lo tum a awm thin anih kha.
Season hmasa erawh kum 30 a upa midfielder hian Gunners tana a season hman that ber tum a tawng a, league ah North London club tan hian goal 7 a khung bakah assist vawi 7 a thawkchhuak bawk.
Xhaka chuan Arsenal tana season duhawm tak a hman hnuin Emirates Stadium chhuahsan turin thutlûkna a siam a, club hotu lam pawhin West Ham United captain Declan Rice an lâkluh theih dawn avangin Xhaka hi chelhbeh an tum hran lova, an hralhchhuak ta nge nge a ni.
Xhaka chuan eng vanga Bayer Leverkusen zawm nge anih tih hetiang hian a sawi, “England ah ka nupui a hlim lo tih thawm thang va te hriat tur a awm a, mahse chutiang chu thu dik lo mai a ni. Anih na takah chuan chona thar hmachhawn duh mi ka ni.”
“Kum 7 meuh hnuah chuan thil thar hlak hmachhawn a hun ve ta. He league hi ka tan a thar hauh lova, club erawh a thar thung. Simon Rolfes (Leverkusen sporting director) leh Xabi Alonso te ka biak hnuin Leverkusen project hi a hlu hle in ka hria a, keimah ah hian 100% a rilrem bawk.”
“Leverkusen hi Germany bakah Europe thlengin thawm a nei lian hle a, an thiltum leh club kalphung hian mi hneh em em bawk. Player tha tak tak te he hmunah hian an lo khel tawh a, inremna leh kawng mumal tak zawh hi ka thil duh a ni.”