Granit Xhaka chuan Arsenal a chhuahsan hnai a, kum 30 a upa hian Bundesliga club Bayer Leverkusen a zawm ang.
Leverkusen chuan Xhaka man tura £13 million bid an lo theh luh tawh chu Gunners in an hnawl a, tunah erawh German club hian bid thar £21 million theh lut leh in heihi North London club pawh in an pawm tawh niin Football London chuan a tarlang.
Xhaka hian 2016 khan Borussia Monchengladbach atangin Arsenal a zawm a, season hmasa kha Gunners tana a season hman that ber tum niin league goal 7 leh assist vawi 7 a thawkchhuak a, a team chu league ah pahnihna niin season a khar pui.
Arsenal in £105 million meuh a Declan Rice an lâkluh dawn avangin kum 30 ral kai tawh Granit Xhaka tan chhuahna kawng an hawnsak a, Swiss international pawh hian a lo khelh tawh na German league lama kir leh a rilrûk ang ngei in a kir leh thei dawn a ni.
Hetih mêk lai hian Mikel Arteta hnuaiah Arsenal an indinthar mêk a, kumin nipui bazarah Kai Havertz chu an player lâkluh hmasak ber niin West Ham United captain Declan Rice an sign fel tep bawk. Tin, Ajax defender Jurrien Timber pawh in Emirates Stadium lam a pan ngei a rinawm a, Brighton midfielder thangduang tak Moses Caicedo pawh Arsenal nena sawizawm anni mêk.