Al elpui ber Real Madrid an tlawm laiin Barcelona erawh in an league game hnuhnung berah an khelmual Camp Nou ah 3-0 in Sevilla an hneh a, an sang fal zel.
Madrid hian rinloh takin an game hnuhnung berah sikhat faiin Real Mallorca an ngam lova, Barca tan hmahruai falna hun tha an siam sak. Xavi nau te’n an hun tha neih an hmang tangkai a, Sevilla lakah point 3 an hmu. Kuminah a zawna game 10 lai hnehna chang tawh Barca hi Laliga table ah point 8 laiin an sang fal ta.
Nizan inkhelah Barca tan Alba, Gavi leh Raphinha te’n goal khat theuh an khung a, a player te chet danah manager Xavi pawh a lungawi takzet.
Champion nomawi kawltu Madrid an chetsual laiin Barcelona lam erawh an che sual duh ve lova, an league game hnuhnung 11 atangin game 10 ah hnehna an chang thei a, an tlawm hnuhnun ber chu October thla laihawl daih tawh kha a ni.
Sevilla hian league a Barcelona an hmachhawn hnuhnung match 15 ah chakni hmel an hmu lova, Camp Nou an tlawh hnuhnung match 20 ah hnehna vawikhat mah an chang lo bawk. Camp Nou a Sevilla in hnehna an chan hnuhnun ber chu December 2002 daih tawh kha a ni.
Barcelona hian tun season ah league game 20 an khelh atangin point 53 an hlawhchhuak tawh a, table chung ber an luah chhunzawm zel. Pahnihna ah Real Madrid an awm a, Carlo Ancelotti nau te hian league game 20 tho an khelh atangin point 45 an khawl ve tawh bawk.
Xavi leh a nau te hian an game leh ah Villarreal an hmachhawn dawn a, chumi zawh ah Europa League last 16 play off ah Manchester United an hmachhawn zui ang.