Barcelona president Joan Laporta chuan manager Xavi Hernandez leh club captain Sergio Busquets te chu contract thar an zawrh tep tawh thu a sawichhuak.
Ram leh club tana teammate lo ni tawh thin Xavi leh Busquets te hi tun thlengin Barcelona tana mi pawimawh an la ni a, pakhat in manager hna a thawh laiin pakhat dangin inkhel mualah team player a la ho tha hle thin.
Hetih mek lai in mi pahnihte hian Camp Nou ah an contract neihlai an hmang zo tep tawh a, Busquets hian kum khat chiah nei tawh in manager Xavi pawhin kum hnih bak a nei tawh lo.
Barcelona President Joan Laporta chuan club tana mi pawimawh pahnih te hi contract thar pek ngei a duh thu hetiang hian a sawi, “Contract thar chungchang ka lo ngaituah tawh a, Xavi hi a thar pek ngei ni se kan duh a, a chhan pawh a phu em vang a ni. A chenna hmun hi a hrechiang a, Barca kalphung hi a man hle. Transfer lamah nise uchuak takin thil a phut lova, he club dinhmun dik tak hi a hria” tiin.
Laporta chuan sawi chhunzawmin,”Busquets chungchang pawh kan sawi tawh a, dressing room a mi pawimawh a ni. He club khelhdan phung hi a rilrem a, Xavi pawhin he hmunah hian la cham zel se a duh. Mumal takin indawrna kan la kalpui lova, amaherawhchu kalpui thuai a ni ang. Kum khat dang contract ziahpui leh ngei turin club lam chuan ro kan nei tawh” a ti.
Busquets hian season kal mek ah Barcelona tan game 29 (all competition) a inlan tawh a, kum 34 a upa ni tawh mahse club tan a la pawimawh in a la tangkai vet vet hle. A team chu point 62 nen Laliga table chung ber a luahpui mek a, 2019 hnuah a vawikhat na a captain na hnuaiah league nomawi an chawi ngei pawh a rinawm.
