World Cup khel tura player thawnchhuak club te atangin City in sum an lalut tam ber

FIFA atanga report tarlan danin Manchester City chu FIFA World Cup 2022 khel tura player thawnchhuak club te atanga sum hailut hnem ber anni.

Club Benefits Programme Report chuan £160.9 million chu club hrang hrang 440 zet hnena an semchhuah thu a tarlang a, player pakhat manah FIFA chuan nitin club hnenah £8429 pe ziah ang a ni.

Player te’n World Cup a an hun hman rei dan a zirin club lamin FIFA atangin an player te manah sum an dawng a, entirnan; player pakhat in World Cup ah an ram an tlâk hma in ni 20 chhung hun hmang se, FIFA in club hnena an pawisa pek tur zat chu 20 x £8429 = £1,68,500 a ni.

Report chuan European club te’n FIFA sum semchhuah atangin 76% lai an chan thu a tarlang a, chu chu £160.9 million atangin £122.32 million lai a ni hem mai! Asian lam chu pahnihna niin club te sum hmuh zawng zawng belhkhawm chu £18.31 million a ni.

Europe bikah English team te chuan sum an dawng hnem bera, £29.03 million lai dawng in chu chu European club te dawn tur atanga 23% a ni. Spain lam chuan £18.7 million an dawng a, Germany lamin £16.17 million dawng in pathumna anni. Italy chuan a ram ang in khel pha lo mahse an league atanga World Cup khel tura fehchhuak player an awm nual avangin Italian club te chuan £14.40 million an dawng a, panga-na ah French lam niin French club te chuan £12.78 million an dawng ve bawk.

Manchester City chu Premier League mai nilo a khawvel huap ang pawha FIFA atanga sum dawng hnem ber anni a, Pep-a team hian an player 16 lai thawnchhuahna atangin £3.54 million an dawng. Manchester City hnuaiah hian Barcelona (£3.49m), Bayern Munich (£3.33m), Real Madrid (£2.95m) leh PSG (£2.95) te an awm.

Tin, Premier League club atangin Manchester United (£2.51m), Chelsea (£2.51m) leh Tottenham Hotspur (£2.18m) te chu FIFA atanga pawisa dawng hnem pawl te anni bawk.

error: Content is protected !!