William Saliba chuan Arsenal ah contract thar a ziak a, kumkhat chhungin £10 million vel a hlawh tawh dawn nia report a ni.
Reiss Nelson an thlunngheh hnuin North London club in an defender pawimawh Saliba an thlunnghet leh tawh a, France international hian kum 4 dang daih turin contract a pawtsei tih Athletic chuan a tarlang. Saliba contract hlut zawng hi kumkhatah £10 million niin release clause erawh a nei lo thung.
Kum 22 a upa hian 2019 khan Gunners a zawm tan a, a contract hlui kha 2024 June thlaa ral mai tur niin tuna contract thar a ziah tak si ah chuan Emirates Stadium ah 2027 June thla thleng contract a nei ta.
Saliba hian season hmasa khan Premier League match 27 a khel a, season tawp lama a inhliam kha thil pawi takin niin league title race a Gunners an tawlhthluk chhan bul pui a ni kan ti thei awm e. Ni 248 teh meuh table chung bera awm Arsenal in Saliba awm loh an tuar em em a, Manchester City kut ata Premier League title an laksak thei lo hlauh anih kha.
Arsenal in Ajax atangin Dutch defender Jurrien Timber an sign fel tep a, kum 22 a upa hi right back leh centre back a chhawr kawp theih niin season tharah Timber leh Saliba te centre back-a an inkawp lai kan hmu fo maithei asin.
Gunners hian William Saliba contract an pawhsei thu official takin la tarlang lo mahse an tarlang thuai dawn e.