West Ham United chuan Manchester United player pathum Harry Maguire, Scott McTominay leh Anthony Martial te lakluh an duh niin report chuan a tarlang. Heng player pathum te hi tun season ah an inlan tam lo em em a, transfer bazar inhawn huna Old Trafford an chhuahsan anih pawhin a mak hran lovang.
Football Insider tarlan danin Hammers manager David Moyes chuan season thar atan a squad thawmthat an tum hle a, Man Utd a tlatlum lo player pathum ngawt mai sign a duh.
Kum 29 a upa Harry Maguire chu Dutch manager Erik Ten Hag hnuaiah a inlan tam lo em em a, season kal mek ah Red Devils tan game 21 a inlan atangin match 10 ah chiah inkhelh bul a tan. West Ham chuan Man Utd captain hi lakluh an duh a, an buaina tur ber erawh a hlawh chungchangah a nih hmel, English defender hian Old Trafford ah kartin pound 2,00,000 a hlawh a, club hausa tak nilo West Ham tan chuan Maguire hlawh hi a tam lulai hret.
Hetih mek lai hian kum 26 mi Scott McTominay pawh Casemiro awm tak hnuin hmun a chang hleithei lova, tun season ah a team tan match 28 inlan tawh mahse match 12 ah chiah inkhelh bul a tan a, goal 2 leh assist vawi 1 a thawkchhuak tawh. Scottish midfielder hian a career hun zawng zawng Old Trafford ah a la hmang a, 2017 khan Man Utd 1st team tan a inlan tan a ni.
Anthony Martial pawh hliam in a tlakbuak nasat avangin season kal mek ah Man Utd tan game 14 chauh a la khel a, goal 6 a khung tawh. Kum 27 a upa hi khel bawr hliam avangin tunah pawh a la chawl a, season hmasa chawhnu lam kha loan in Spanish club Sevilla zawm mahse beisei erawh a pha lem lo. Nipui bazar inhawn hunah French striker hi Old Trafford chhuahsan tura ngaih a ni.
West Ham hian squad thawmthat an mamawh hle a, season kal mek ah league game 24 an khelh atanga point 23 chauh la hlawhchhuakin table ah 16-na anni mek. An game leh ah Brighton an hmachhawn ang.
