Arsenal lama Declan Rice an hralhchhuah hnuin West Ham United chuan Manchester United captain Harry Maguire duhna an tharthawh ve leh ta.
Daily Telegraph tarlang danin Hammers in Rice hralhna atanga £105 million meuh an hmuh hnuin an squad thawmtha turin Maguire lâkluh an duh a, David Moyes chuan English international hi a hnuaia tha taka a khelh theih a beisei. Hetih mêk lai hian Maguire erawhin Man Utd a la cham zel a duh thung a, season hmasa lamah inkhel tam lo mahse hmun nghet chang turin theihtawp chhuahin a bei dawn.
Hammers chuan Man Utd captain hi a ngheta lâkluh ai chuan loan a hawh an rilrûk a, chutihrualin Rice hralhna atanga sum thahnem tak an hmuh avangin loan fee bakah player hlawh an pe tam thei ang.
Kum 30 a upa defender hian a hma hun tur a tihfel vat a ngai dawn a, The Three Lion boss Gareth Southgate chuan Maguire hi Euro 2024 a hmun nghet chang turin tun anga renga a inkhelh tlem theihloh thu a lo sawi tawh anih kha.
Maguire hian season hmasa khan Erik Ten Hag hnuaiah Premier League game 8 ah chiah inkhelh bul a tan a, Lisandro Martinez leh Raphael Varane te chu Dutch manager centre back rinrawl te anni. Leicester City star hlui hian a inkhelh tam theihna tur club tê zawk a pan dawn nge Man Utd ah hmun nghet chang turin a bei chho ang tih chu kan hre thuai ang.
Maguire hian 2019 khan £80 million in Leicester City atangin Manchester United a zawm a, khawvela defender man to ber record a siam nghe nghe. Kum 30 a upa hian Old Trafford ah season hnih dang contract a la nei a, kumin nipui bazar hian Old Trafford chhuahsan thut thei a ni reng.