West Ham United in loan a Harry Maguire hawh an dilna chu Manchester United lamin an hnâwl a, an defender hi sum faia hralhchhuah an duh thung.
Guardian tarlan danin London club hian Maguire chu a nghêta lâkluh an inhuam loh avangin Red Devils hnenah loan a hawh an dil a, amaherawhchu an dilna hi hnâwlsak niin Man Utd chuan an captain hlui hi man neia chhuahtir an duh a, a transfer fee ah £50 million an phut!
West Ham chuan Maguire hi loan a hawh a, season zawh ruala a ngheta lâkluh theih dan awm se tih an duh a, chutihrualin tuna kum 30 a upa hlawh zat hi West Ham hotute chuan pêk an inhuam lo.
UCL khel tura Man Utd an inpettlin leh tâk avangin Maguire hlawh hi a pung leh deuh a, hei hian a lâkluh kawngah pawh harsatna a thlen belh a ni hawt. Foxes defender hlui hian inkhelh tam a duh a club dang a zawm chuan a hlawh tihhniam deuh a inhuam a ngai ang.
The Three Lions boss Gareth Southgate chuan Maguire hi ram aiawha inlan zel turin bench a hun a hman reng theihloh thu a lo sawi tawh a, English defender hian a hma turah thutlûkna fel tak a siam ngei a ngai.
Red Devils boss Ten Hag chuan Maguire hi a captain nihna a hlihsak a, hei hian a rintawk loh zia a tifiah viau âwm e. Man Utd chuan an defender hi hralhchhuah an rilrûk a, amaherawhchu an lâkluhna man a tam em avangin a transfer fee an chhiar to lo thei lova, a hlawh lah a tlem chhe lo viau nen, club dang tan Maguire lâkluh hi thil awl ai a ni hauh lo a ni.