Sky Sports pundit Gary Neville chuan Manchester United tana Dutch striker Wout Weghorst pawimawhna a sawifiah.
Dutch striker hian kumin January thla khan loan in Burnley atangin Manchester United hi a zawm a, thlaruk chhung daih tur contract ziahpui a ni. Red Devils a zawm hnuin game zawng zawng ah a inlan kim vek mahse goal khat chauh a la khung a, chu pawh Carabao Cup semifinal a Nottinngham Forest an hneh tumin a ni.
A stats lamin beisei pha lo mahse Ten Hag chuan Weghorst hi a sub ngai lem lova, team ang in result erawh a nei tha fu zel tho. Manchester United legend Gary Nevile pawhin team tana Wehghorst pawimawhna hetiang hian a sawifiah.
”Weghorst hi ka player duh tak a ni a, game tina thlan a nih ziah chhanah pawh Ten Hag hian fak a phu. Season hmasa khan Ronaldo hovin Man Utd in an press hleithei lo tih ah inhnialna a awm fova, tun ang hunah chuan forward te’n khingpuite an press thei tur a ni.”
”Team in an khingpuite an nawr leh thut kawngah Weghorst hi a tangkai em em a, set piece a defending kawngah a thawhhlawk hle bawk. Team tan hna pawimawh tak a thawk a, chuvanga kartin inkhel pawh a ni” tiin Neville chuan Weghorst pawimawhna a sawi.
Kum 30 a upa hian season kal mek ah a team chu league point 49 hmuh pui tawhin table ah 3-na anih pui mek a, league title chawi thei tur zingah Ten Hag nau te an tel ve ta. Man Utd hian an game leh ah Barcelona an hmachhawn dawn a, Old Trafford ah Europa League knockout round play off 2nd leg khelh a ni ang. Team pahnihte hi Camp Nou a first leg an khelh tum khan 2-2 in an inhnehtawk a ni.
