Nizan Premiere League match Watford leh Manchester United khelhah khan Watford lam chuan 4-1 in hnehna an chang a, an khelh zawh hnu khan Manchester United fans te chuan Ole Gunnar Solskjaer chungah lungawi lohna an lan tir avangin Bruno Fernandes chuan Ole hi a chhan a, hei vang hian fans nen pawh an intithiam lo.
Red Devils hi Watford lakah 4-1 in an tlawm a, an captain Harry Maguire chuan red card a hmu bawk.
Game khelh zawh a nih khan Solskjaer leh player te chu field chhuahsana an kal mek laiin fans thenkhatten thinrim takin Solskjaer hi an lo au a ni awm e.
Hetihlai hian Norwegian Ole pawh fans te hnenah ngaihdam a dil ve bawk, Bruno Fernandes chuan mipui au a han hmuh chuan ring takin manager ni lovin player te hi min hrilh zawk rawh tu tiin a hrilh.
Hetia a han takah chuan tunnel lamah fans thahnem tak an rawn chhuk thla a, United lama a teammate Fred chuan Bruno Fernandes hi hmun dangah a hruai nghe nghe.
Inkhelh zawh khan Fernandes chuan coach ni lovin squad-a awm zawng zawng te hi mawhchhiat tur kan ni zawk e tiin a sawi.
“Hmalamah ball kan khawih mang lova, kan tackle bawk lo. Quality kan neih that zia pholan hun a ni a, quality neih that vangin Manchester United-ah kan khel a ni” tiin Bruno Fernandes chuan a sawi niin The Sun in a tarlang.
“Hetah hian a tupawh maiin kan ti sual, coach ni lovin, player pakhat chauh tihsual pawh a ni hek lo, mi tupawhin kan ti sual a ni. Mi tupawhin kan tihtur awm kha hlen tur a ni, a chhan chu tha takin kan che thei vek.” tiin a sawi bawk.
Source sL