Juventus striker Dusan Vlahovic chuan Paris Saint Germain zawm a duh avangin Chelsea sawmna a hnawl dawn tih report chuan a tarlang.
Kum 23 a upa hi European club lian thenkhat nena sawizawm mek anni a, chung zingah chuan PSG leh Chelsea te chu thawm nei lian ber te anni. Juventus hi season hmasa khan hrem an tawk a, ‘capital gain case’ avangin an point hmuh tawh atanga point 10 lai mai paihsak anni!
Hemi avang hian Juventus chuan league ah 7-na niin season an khar a, season tharah Champions League leh Europa League te aia inelna hniam zawk Europa Conference League an khel dawn.
Vlahovic chuan season tharah hian Champions League khelh a duh a, chona thar hmachhawn tura league dang pan a duh bawk avangin kumin nipui bazarah hian Serie-A chhuahsan fel a inpeih.
Chelsea leh PSG te chu tun dinhmuna Vlahovic ngaihven ber tu te anni a, Vlahovic erawh in season thara UCL khel lo tur Chelsea lam aiin French champion lai Paris Saint Germain zawm a duh zawk niin journalist Alfred Pedulla chuan a sawichhuak.
Kum 23 a upa striker hian season hmasa khan Old Lady tana league game 27 a inlan atangin goal 10 leh assist vawi 2 a thawkchhuak a, kumin hian club dang zawm a duh.
Juventus chuan Vlahovic hi January 2022 khan a nghetin £66.6 million in Fiorentina atangin an lalut a, kuminah an hralhchhuak dawn anih chuan an striker manah hian £70 million vel an beisei nia sawi a ni.
Engpawhnise a transfer chungchangah Juventus leh club dang an inrem fel hma chu Vlahovic hi Juventus player a la nih ang in pre season training nei turin club ah a kir leh ang.