UEFA Champions League Round of 16 1st leg a Real Madrid in 5-2 a Liverpool an tukdawl hnuin Carlo Ancelotti chuan an winger Vinicus Jr a fak hle a, khawvela thutlukna siam thiam ber player anih thu a sawichhuak.
Nizan inkhelah kum 22 a upa Brazlian winger hian Anfield ah goal hnih leh assist vawi 1 a thawkchhuak a, Madrid an comeback theih nana a sulsutu ber a ni ti ila a sual tam awm lo ve.
Inkhelh banah Real Madrid head coach Carlo Ancelotti chuan Vinicius Jr laka a ngaihdan hetiang hian a chhakchhuak, “Vawiin hian ka mimal ngaihdan ah chuan khawvelah Vinicius hi inkhel muala thutlukna siam thiam ber player a ni. A chawl lo a ni ber a, dribble, assist leh score thlengin a thei vek. Thutlukna dik siam rang ber player a ni a, tun anga a khelh chhunzawm zel pawh ka beisei” a ti.
1st leg ah 5-2 laiin hnehna chang mahse Carlo Ancelotti erawhin Liverpool nena an inbeihna a la tawp loh thu leh Klopp a nau te chu team tha tak an nih thu hetiang hian a sawichhuak, “Minute hmasa 90 ah chuan a chan tha zawk kan ni ngei mai a, amaherawhchu minute 90 dang khelh tur kan la nei. Liverpool hi team elpui tham tak anni a, kan tan pawh harsatna an thlen nasa hle a, vanduaithlak takin kan inbeihna hi a la tawp lo bawk. Ka ngaihdan chuan team ropui tak anni a, an game a rang in an chak hlawm hle a, anni anga team tha hi Europe ah hmuh tur an tam lo.”
2nd leg hi March ni 16 zinglam dar 1:30 a khelh a ni dawn a, team pahnihte hi Santiago Bernabeu ah an insu ang. First leg a goal 5 lai chhuah tawh Reds lamin beisei tur an nei chaurau hle a, chutihrualin eng pawh la thleng thei a ni. Champion lai Real Madrid in champion phu an nih zia Anfield ah an lantir a, an nomawi humhim turin an la tha tawk e.
