Vawiin Zirtawpni hian Harry Kane transfer chungchangah Bayern Munich hotute leh Tottenham Hotspur chiarman Daniel Levy te chuan hmaichhanah ngei mai inbiakna an nei dawn.
Kan hriat ang in Kane an Spurs ah season khat bak contract a nei tawh lova, club lamin contract thar ziahtir tumin thlem eng ang mahse an hmin thei lova, loh theih lova an hralhchhuah a tul dawn niin a lang ta.
Tottenham Hotspur neitu Joe Lewis chuan club Chairman Daniel Levy hnenah Harry Kane an contract thar ziah a tum loh chuan hralhchhuak mai turin a lo hrilh tawh a, club neitu duh dan ang ngei in club chairman pawhin hma a la tan dawn.
Bayern Munich leh Harry Kane te’n mimal thilah inremna an nei fel tawh nia report a ni a, German champion pawhin kum 29 a upa hi lâkluh ngei tumin theihtawp an chhuah mêk zel.
Kum 29 a upa striker man turah Bayern chuan bid vawi hnih lai theh lut tawh mahse hnâwl ve ve a ni a, an bid hnuhnung ber €80 million + add ons pawh karhnih liamta khan Spurs lamin an hnâwl. Bayern hian Kane man tur bid thar an theh lut leh dawn a, Kane mana Spurs beisei zat €100 million a hnaih thuak tawh in a rinawm.
Hetih mêk lai hian Paris Saint Germain lam pawhin Spurs striker hi an ngaihven a, chutihrualin Bayern Munich a zawm theih loh chauh in lâkluh an tum tak tak ang. Ligue 1 champion hian kuminah Lionel Messi an chân hnuin Kylian Mbappe chân leh thei dinhmunah an ding mêk a, hetiang anih avang hian an hmatawng tichak zual turin Dusan Vlahovic, Rasmus Hojlund leh Harry Kane te an ngaihven mêk.