Dwight Yorke chuan kumin nipui bazarah Manchester United in Paris Saint Germain forward Kylian Mbappe lâkluh tum ngei se a duh thu a sawi.
Kan hriat ang in Mbappe hi kuminah PSG chuan hralhchhuah an duh a, Saudi club Al Hilal phei chuan kum 24 a upa manah hian PSG hnenah €300 million lai an offer nghe nghe.
Amaherawhchu Mbappe hian Saudi lam a pan duh in a rinawm lova, Spanish club ropui Real Madrid chu a kal duhna hmun a ni. PSG in an hralh phal tâkah chuan Mbappe hi Premier League club lian thenkhat te pawhin an ngaihven mêk a, a ngheta an lalut thei kher lo anih pawhin loan a lâkluh an hnial hauh lovang.
Man Utd striker hlui Yorke chuan Mbappe chu Man Utd in lâkluh tum ngei se a duh thu leh an lâkluh theih hlauh chuan team tana nghawng tha tak a thlen tur thu a sawi.
Yorke chuan, “Manchester United in Kylian Mbappe lâkluh an tum tur a ni. An lâkluh theih hlauh chuan Manchester khaw club pahnih superstar (Haaland vs Mbappe) te ah inelna a awm ang a, Mbappe an Old Trafford a pan anih ngat chuan Man Utd hian inkhel mual leh pawn lamah an hlawkpui khawp ang. Kum engemaw zah chhung chu Man Utd hi number one anni tawh lova, dinhmun sang bera kaichho leh turin Mbappe hian a pui thei ang.”
”Inter Miami chunga Lionel Messi thiltih kan hmu a, hetiang chiah hian Old Trafford a pan anih chuan Mbappe pawhin Man Utd ah nghawng tha a nei thei ang. Premier League hi khawvela league tha ber a ni tawh a, Mbappe a lo luh leh ngat phei chuan tun aia tha zawk ah a siam ang. Man Utd in Mbappe an lâkluh chuan title chawi thei tur zingah an tel nghal dawn a, player te ah danglamna tam tak a thlen bawk ang.”
“Team thenkhat ka lo khelh tawhna te ka thlir let a, player tha te hian team hi 20% vel laiin an chawkphur zual sauh thei. Cristiano Ronaldo an 2021 a Man Utd a zawm tuma phurna a thlen ang khan Mbappe pawh hian team ah phurna thar a thlen thei ang. Chuvangin Mbappe hian Man Utd a zawm anih chuan player te mai nilo fans te thlengin phurna nasa tak a pe dawn a, league lamah mai nilo UCL lamah pawh team tawhkhirh ber pawl anni ang” a ti.
Tun dinhmunah Mbappe hian contract thar a ziah duh loh avangin pre season squad-a telh a ni lova, a hma hun zel tur kan hre chho thuai ang. Hetih mêk lai hian Erik Ten Hag hnuaiah Man Utd pawhin pre season an nei chho mawlh mawlh a, naktuk zinglam dar 6 ah Real Madrid an hmachhawn ang.