Manchester United chuan hun engemaw ti chhung an lo dawr tawh Andre Onana chu add ons telin £43 million in an lalut thei dawn a, kum 5 chhung daih tur contract ziahpuiin thla 12 dang pawhsei theih tur a ni bawk ang.
United hian vawiin ni la la hian Onana an lâkluh fel thu an puang hman maithei a, US tour a team player dangte ruala a zinchhuah ve theihnan a visa tur buaipui sak mêk a ni bawk.
Red Devils hian tun Pathianni lo thleng tur zinglamah an pre season game thumna an khel dawn a, Mikel Arteta hnuaia kalvung tak Arsenal an hmachhawn ang. He match hi Man Utd tana Onana gama hmasa ber anih a rinawm a, Erik Ten Hag nau te hian Real Madrid leh Borussia Dortmund te pawh an la hmachhawn bawk ang.
United in kum 12 chhung teh meuh an kawl hnuin Spanish goalkeeper David De Gea an chhuah zalen a, kum 32 a upa thlâktu turin kum 27 mi Cameroon goalkeeper chu Erik Ten Hag an a lalut.
Onana hian season hmasa khan Inter Milan tan game 41 a khel a, a team chu Coppa Italia leh SuperCoppa te chawipuiin Champions League final hial a hlangkai a, Simone Inzhagi hnuaia player pawimawh ber te zinga mi a ni.
Man Utd in Onana an lalut fel thei anih chuan kumin nipui bazarah player lâkluh nan £100 million chuang an insêng tling dawn tihna a ni a, a hma lamin Mason Mount chu Chelsea atangin £60 million in an lo lalut tawh anih kha.
Man Utd lâkluh tum dang leh chu striker thar a ni a, tun dinhmunah Atalanta leh Danish striker kum 20 chauha la up Rasmus Hojlund chu Red Devils top target a ni.