Thomas Tuchel chuan season tan tirh atan Chelsea chu UEFA Super Cup nomawi a chawi pui nghal a, nizan Villarreal nen an khelh khan penalties hmangin 6-5 in hnehna an changa ni. Nizan UEFA Super Cup khelhah khan hun pangaiah 1-1 in an indraw a, extra time khelh hnuah pawh goal a luh tak loh avangin penalty hi an pet ta a ni.
Extra time tawp dawn lamah Thomas Tuchel chuan Kepa Arrizabalaga a luh tir a, a luhtir fuh ang reng hle, penalty vawi 2 a save a ni. Chelsea in nomawi an chawi theihnaah Chelsea defender Trevoh Chalobah pawh hi a che tha ang reng hle a, Chelsea head coach Thomas Tuchel chuan a fak hle.
Thomas Tuchel’an Trevoh Chalobah chet dan a fak
UEFA Super Cup khelh takah khan Chelsea defender Trevoh Chalobah hi a che tha ang reng hle a, pre-season friendlies match an khelh tak dangah te pawh khan a che tha hle, tunah hian loan a chhuah tum anga sawi mek a ni, mahse, Thomas Tuchel hian a ngaihtuah tha leh dawn niin an sawi.
Kum 22 a upa chauh ala ni a, Spanish league La Liga club Valencia lamah loan-a kal tur anga sawi a ni. UEFA Super Cup a Trevoh Chalobah chet dan avang khan Chelsea boss Thomas Tuchel chuan Chalobah hi Premiere League khel thei turin a tling tawk tih a sawi chhuak.
German coach chuan, “Arsenal lakah khan a che tha tak zet a, Bournemouth lakah pawh a che tha a, a hnuah Arsenal leh Tottenham lakah pawh a che tha tak zet. Ani hi minutes 90 vel khel thei tura kan duh a ni a. Trevoh training hmasak ber atang khan physically takin a strong a, a khelh tawh chinah a che tha em em vek mai, vawiinah pawh a strong tak zet” tiin a sawi.
Chalobah chungchang sawi belh zelin, “Thenkhatah kha chuan a che chhe tep zel a, mahse, a side lamah Azpi (Cesar Azpilicueta) leh Jorgi (Jorginho) ten an hnaih a, an puih thei. A hmachhawn tawh chu a chhuah ngai ngai lova, a chet dan a hahdam, physical tak pawhin minutes 120 lai a khel thei a ni. A tha tak zet. Loan-a a chhuak tur pawh hi kan ngaihtuah a ngai maithei, eng thil nge thleng dawn kan thlir a, tunah hian a chungchang sawi theihna turin hun kan la nghah rih a, mahse, tunah hian team tana a hlutna a pholang der tawh.” tiin a sawi bawk.
Source RW