UEFA Champions League Round of 16 first leg ah Borussia Dortmund chuan an khelmual Signal Iduna Park ah Chelsea an lo mikhual a, mual neitu lam hian Adeyemi goal khat hmanga hnehna changin 2nd leg ah goal khat nei sa in match an khel thei dawn.
Chelsea hian March ni 8 zinglam dar 1:30 ah an khelmual Stamford Bridge ah German club hi an lo mikhual ve dawn a, goal khat phur tawh mahse an tan last 8 beiseina erawh a la tawp mai lo.
Nizan inkhelah Atletico Madrid atanga loan a Chelsea zawmtu Joao Felix chuan first half chhungin a chance tha neih vawi hnih a hlah a, a pawi thui viau. German rawlthar kum 21 a upa Adeyemi chuan minute 63 na ah he match a goal lut awmchhun hi a khung a ni.
Dortmund hian European competition a English club an hmachhawn hnuhnung vawi 11 ah vawikhat hnehna an chang ve ta a, Chelsea an hneh hmaa English club an hneh hnuhnun ber chu Tottenham Hotspur niin March 2016 daih tawh kha a ni nghe nghe.
Chelsea forward rinrawl Kai Havertz chuan nizan khan chance vawi 4 a siam bakah shots vawi 4 lai a nei a, amaherawhchu a pawimawh ber goal erawh a khung lo. German international hian a career ah tum 8 lai German club Borussia Dortmund hi a lo hmachhawn tawh a, goal khat tê mah a la khung lo thung!
January transfer window a player thar lâkluh nana £300 million dâwn insêng Chelsea an chak hleithei lova, an game hnuhnung 9 (all competition) atangin vawi 1 chiah an chak! An game leh ah Southampton chu Premier League ah an hmachhawn dawn a, Graham Potter an a nau te hi hnehna chanpui ngei a tum ang.
Blues hian tun season ah league game 22 an khelh atangin point 31 chauh an la hlawhchhuak a, table ah 10-na anni mêk. Top 4 huanga season khar turin an hmabak a ko angreng viau a ni.