Kai Havertz chuan tunkar chhung ngei hian a club thar Arsenal tana a match hmasa ber a khelh a rinawm a, pre season training pawh tha takin a hmang chho mêk.
Gunners player te chu Pathianni liamta khan Germany ah pre season training session hmasa ber an nei a, tun Nilaithawhtanni hian Nurnberg nen friendly match ah an inhmachhawn ang. Herzogenaurach a Adidas headquarters ah season thar atana inbuatsaih mek Arsenal 30-men squad ah Havertz hi a tel.
German international hian Chelsea atangin £65 million in Arsenal a zawm a, kumin nipui bazara Arsenal player lakluh hmasak ber a ni nghe nghe. Uiawm taka season hmasa lam khartu Arsenal an tang em em a, an squad tichak turin Havertz bakah Declan Rice leh Jurrien Timber te pawh an la lalut dawn.
Arsenal player te’n training zangkhai tak an la nei rih a, an taksa dinhmun leh an fitness a zirin tun Nilaithawhtanni a friendly match khel tur thlanchhuah a ni ang.
Player te duh ber erawh USA tour a team player dang ruala zin ve a ni a, USA a pre season tour nei turin Gunners player te chu tun Pathianni lo thleng tur ah hian an zinchhuak ang. An player lakluh leh tur pahnih Declan Rice leh Jurrien Timber te’n an rawn zawm hman ngeiin a rinawm bawk.
Arsenal boss Mikel Arteta chuan Kai Havertz hi number 8 role play tir a tum nia sawi a ni a, he position ah hian Bayer Leverkusen tan Havertz chuan tha takin a lo khel tawh thin a nih kha.
