2020-21 Premiere League season-ah khan Liverpool hi duh angin an che tha lem lo. Season tantirhah an defensive thiampuipa Virgil van Dijk’an hliam a neih avangin duh ai hmaah a chawl. Amah chauh hi hliam nei a ni lova, player tha dang te pawh hliamin a ti buai ve hlawm a ni.
An player tha ten hliam an neih avangin England leh Europe lamah nomawi an chawi theilo. Mahse, season a tawp meuh chuan Premiere League table-ah pathumna an hauh pha hram a, season tharah chuan insiam that an mamawh ve hle niin a lang.
Engpawhnise, tun summer transfer a Liverpool target 5 te kan rawn tarlang ve leh e.
5. Yves Bissouma – Brighton
Tun summer transfer intan tirh khan Yves Bissouma hi club hrang hrang nena sawi zawm a ni.
Kum 24 a up Bissouma hi midfielder-ah a khel a, kumin hian Brighton tan a che tha hle, Liverpool in an player tha Gini Wijnaldum chu Paris Saint-Germain lakah an chan tawh a, Reds hian midfield tha ve tak talent nei tha tak thar lak luh an mamawh hle.
Premiere League player hmasawn tak Bissouma man atan hian £40 million lai a nih a rinawm.
4. Florian Neuhaus – Borussia Monchengladbach
Florian Neuhaus pawh hi Liverpool player melh zingah a tel.
German player hi season khelh zawh takah khan Bundesliga lamah a che tha hle, tunah hian kum 24 a upa niin Borussia Monchengladbach tan a khel mek a, player pawimawh tak pakhat niin table-ah pariatna a hauh pui.
Liverpool boss Jurgen Klopp hian player rawlthar talent nei tha lak luh a tum dawn niin an sawi. Florian Neuhans man atan hian £35 million an hauh niin an sawi.
3. Donyell Malen – PSV Eindhoven
Donyell Malen hi rawlthar talent nei tha tak pakhat a ni a, European club lian hrang hrang te duhrawn a ni mek.
Kum 22 a upa niin attacker a ni a, tunah hian PSV Eindhoven, Eredivisie tan a khel mek. Season liamta khan league match 32 a khelh atangin goal 19 lai a khung a, PSV chu table-ah pahnihna a hauh pui a ni.
Liverpool forward Roberto Firmino hi duh angin a che tha lova, amah thlak theitu tur emaw aiawh tu tur Liverpool hian lak an mamawh hle. Donyell Malen hi Liverpool attaker lak tur zingah a tel.
2. Renato Sanches – Lille
Renato Sanches hian club leh ram tan season duhawm tak a hmang.
Sanches hi Benfica lama a khelh lai khan a che tha hle, a chet that em avangin kum 2016 khan Bayern Munich chuan an la lut a, mahse, kum 3 chhung in match 36 chiah a inlan thei a ni.
Tunah hian Lille tan a khel mek a, kum 23 a upa chauh la ni rih mahse, a che tha thei hle. Ligue 1 champion Lille tan player pawimawh tak pakhat a ni.
Euro 2020 khelhah pawh Portugal tan a pawimawh hle, tuna a hlutna chu £27 million a ni.
1. Raphinha – Leeds United
Liverpool in Leed United rawlthar Raphinha lak an tum tih thawm hi tun hnai lawk atanga rawnn irh chhuak a ni. Kum 24 a upa Raphinha hi Premiere League lamah a che tha tak zet. Fans tena an duhrawn pakhat a ni.
Premiere League lama season khat a hmannaah goal 6 a khung mai baka assist vawi 9 a nei tling. Chance vawi 64 lai a siam a, big chance vawi 12 a siam bawk. A chet dan han thlir chuan a che chhe zawkzawk lo.
Source SK