Premiere League 2021/22 season chu an tan leh der tawh a, season tan tirh phat atangin a hmuhnawm nghal a, an khelh tawh chinah game hmuhnawm tak tak ani deuh zel mai.
Kan hriat angin Premiere League hi khawvel league hmuhnawm ber anga sawi a ni a, tun tumah pawh hian game hmuhnawm ber a nih zia kan hmu chho leh dawn niin a lang. Chelsea, Crystal Palace leh Manchester United ten attacking football hmuhnawm tak tak an chhawp chhuak ve a ni.
Hun ala tam mai bakah game khelh tur pawh ala tam hle a, chak tur rinlawk a harsat ang bawkin Golden Boot dawngtu tur lo rinlawk pawh thil harsa tak ani ngei ang. Mahse, tun tumah hian Premiere League Golden Boot dawngtu tura rinkai player 5 te kan rawn tarlang ve leh dawn a ni.
5 Michail Antonio (West Ham United)
Michail Antonio hi West Ham tan a che tha hle a, right back leh Right wing-ah a khel thei ve ve a ni.
Tunah hian Hammers tan striker angin a khel mek. Kum 2015 khan West Ham United chuan Nottingham Forest atangin £9 million vel chauhin an la lut a, an la lut fuh hle. League one leh Isthmian League Premier Division-ah te pawh alo khel ve thin tawh bawk.
Tunah hian kum 31 upa ani tawh a, a that vanglai vel tak a ni. Tun season khelh mekah match 4 inlan tawhin goal 4 a khung a, hei mai bakah assist vawi 3 a nei tling bawk. Jamaica international Michail Antonio hi a chet that em avangin August thla Premiere League Player of the Month award a dawng a ni.
4 Mohamed Salah (Liverpool)
Premiere League Golden Boot dawng tura rinkai zingah Mohamed Salah hi ala lang deuh ziah a, Liverpool player pawimawh tak leh goal khung thei tak pakhat a ni mek.
Kum 29 a upa Salah hian Liverpool tan match 206 a khel tawh a, goal 127 a khung mai bakah assist vawi 49 lai a khung tawh a ni. Tun season khelh mekah match 3 a khelh tawh atangin goal 2 a khung a, assist vawi 2 a nei tling bawk. Zanin hian Leed United an hmachhawn leh ang.
3 Harry Kane (Tottenham Hotspur)
Tun summer transfer window inhawn lai khan Manchester City leh Harry Kane hi sawi zawm anni a, mahse, transfer window a han tawp meuh chuan a khelhna ngai Spurs ah a khel leh dawn a ni.
Khawvel striker tha ber pakhat ani a, tun season khelh mekah Tottenham tan game 2 khel tawh mahse, goal erawh ala khung thei bik lo.
2 Romelu Lukaku (Chelsea)
Chelsea chuan Champions League squad-ah khawvel striker tha ber pakhat Romelu Lukaku an dah belh leh a, Champions League lamah pawh an ngaihtuahawm vak lovang.
Inter Milan lamah season 2 class taka a hman hnuin Romelu Lukaku chuan Chelsea a pan leh a, Lukaku hi Premiere League lama mikhual lo tak a ni. Chelsea, West Bromwich Albion, Everton leh Manchester United-ah te alo khel kual tawh thin.
Tun season khelh mekah league match vawi 3 khel tawhin goal 3 a khung tawh a ni.
1 Cristiano Ronaldo (Manchester United)
Nizan Premiere League match Manchester United leh Newcastle khelhah khan C Ronaldo chuan a vawi hnihna atan a game hmasa ber a khel ve leh a, goal 2 a khung nghal der.
C Ronaldo pawh hi Premiere League lamah a mikhual vak lo, kum 2003 leh 2009 karah khan tha takin alo khel ve tawh a ni. Mi tamtakin Premiere League Golden Boot a dawn ngei an ring mek.
Source SK