Laliga table hmahruaitu Barcelona chuan nizan khan rinloh tak mai in table mawng lama awm Almeria chu sikhat faiin an hneh lova, Spanish coach Xavi chuan season kal mek a an game chhiat ber tum anih thu a sawi nghe nghe.
He inkhelah hian mual neitu lam atangin Toure chuan minute 24 na ah goal lut awmchhun hi a khung a, Barcelona lakah a team chu point 3 hlu tak hlawhchhuah pui in relegation zone atangin an talchhuak chiah bawk.
Barca in hun duhawm lo an tawng mek a, Europa League atanga Man Utd in an petchhuah hnuin league ah team nem Almeria an ngam lo zui.
Inkhelh banah Barca boss Xavi Hernandez chuan a rilru a awm hetiang hian a sawichhuak,”Ka thin a rim takzet a! Tun season a kan game chhiat ber tum a ni. A bikin first half kha a chhe uchuak hle a, kan game kalphung leh thathona kan hloh mai bakah chak tumna tak tak rilru kan pu lo.”
”2nd half ah kan ziaawm hret a, amaherawhchu game harsa tak a ni tawh. Point 7 in league ah hma kan la hruai tho e. Kan tih dik tawk loh avangin fans te hnenah ngaihdam kan dil a, Laliga chawi hi a awlsam dawn lo. Tunah erawh Copa del Rey inelna lama rilru kan pek leh phawt a tul” a ti.
Blaugrana hian tun season ah league game 23 an khelh atangin point 59 an hlawhchhuak tawh a, table chung ber la luah chhunzawm zel in an hnuai chiaha awm leh champion lai ni bawk Real Madrid chu khelh zat in ang ah point 7 laiin an chungtlak.
Barcelona game leh tur hi Copa del Rey semifinal 1st leg niin Santiago Bernabeu ah Real Madrid an hmachhawn dawn a, match hi Nilaithawhtan zanlai / Zirtawpni zinglam dar 1;130 ah khelh a ni ang. El Clasico thlir tur kan nei hnai leh tawh e!