Tun nipui bazara £200 million chuang inseng tur Arsenal tan pressure a sang dawn!

Arsenal in uiawm taka 2022/23 season an khar fel hnuin season tharah chak zawka lo kir ngei an tum a, kumin nipui bazar zet zawng tum dang zawng aiin an thawm a lian anih hi!

Club hotute’n Mikel Arteta lakah rinna an nghat ngam tih a chiang a, squad thawmtha turin sum thahnem tak theh chhuah an inhuam a, an theh chhuak mek bawk.

Gunners hian kumin nipui bazara an signing hmasa ber turin Kai Havetz chu Chelsea atangin an lalut a, kum 24 a upa German international manah hian North London club chuan £65 million an inseng.

Mikel Arteta an hun rei tak chhung a lo awh tawh Declan Rice a sign thei ngei dawn bawk a, kum 24 a upa tho manah hian Gunners leh West Ham te chu £105 million a inrem hi Rice hian British player man to ber record thar a siam hnai. English midfielder hian 2022/23 season khan Hammers chu Europa Conference League a chawi pui a, a captain na hnuaia he hlawhtlinna chang hi anni nghe nghe.

Arsenal in player pahnih Havertz leh Rice te man belhkhawm ah ringawt £170 million lai an theh chhuak dawn a, Ajax atangin Jurrien Timber chu £50 million vel an lakluh ngei a beiseiawm bawk.

Player thar pathumah Mikel Arteta a duhtawk mai dawn em a la chiang lova, Manchester City full back Joao Cancelo bakah Southampton rawlthar thangduang tak Romeo Lavia te chu Gunners hian an ngaihven mek nia report a ni.

Hetiang anih takah chuan kumin nipui bazarah Gunners in player thar lakluh nan a lo berah £230 vel chu an inseng dawn a, a namai lo hle! Gunners in kuminah transfer bazar khata sum an insen hnem ber tum an tawng ngei dawn a, hei hian Mikel Arteta leh Arsenal team te lakah pressure nasa tak a pe ngei bawk in a rinawm.

Kan hriat ang in Mikel Arteta leh a nau te’n mite beisei phak baka 2022/23 season kha hmang tha in league champion ni thei tura dinhmun tha ah ni 248 teh meuh an awm! Amaherawhchu season tawp lamah Gunners squad chhah tawk lohna langchhuakin an inpalthlu nawk nawk a ni bera, hetih mek lai hian an elpui City lam an tawlhthluk ve duh der tak si lo ah chuan Pep leh a nau te a zawnin a season thum nan league title an hlawhchhuak leh ta nge nge a ni.

Gunners in an panna lai hria in kuminah theihtawp chhuan an inthawmtha tan a, player an ngam huai em avangin squad tichhah tura an player lakluh thar leh lakluh tur te pawh kum tam lo tak ni chung pawha hming lian tak tak anni hlawm.

Engpawhnise season tharah Mikel Arteta leh Arsenal team lakah mite beiseina a sang dawn a, North London club hi pen khata hmasawnin league title an hlawhchhuak thei tawh ang em tih chu zawhna awm a ni.