David De Gea chuan Manchester United a kum 12 chhung a khawsak hnuin free agent in club a chhuahsan fel ta.
Spanish international hian contract thar ziak tura sawmna dawng mahse 2nd choice goalkeeper nih a duh lova, Man Utd chhuahsan turin thutlûkna a siam fel ta nge nge a ni.
Kum 32 a upa chuan hetiang hian Man Utd thlahna thu a sawichhuak “He inthlahna thu hi Manchester United fans te zawng zawng hnenah ka thawn duh e. He club kawr ka hak apiang hian ka inchhuang hle thin a, team kaihhruai leh khawvela club ropui ber tana inlan hi chawimawina ropui tak footballers tlem tê hnen chauha pêk a ni.”
“He hmun ka lo pan tirh phat ata ka theihnghilh ngai tawh loh tur thil tam tak leh hlawhtlinna ropui tak kan chang a, Madrid atanga tleirawl tê ka nih laia he hmun ka rawn pan khan tun ang hlawhtlinna hi kan chang dawn tih ka beisei pha lo.”
“Tunah erawh chona thar hmachhawn hun a inherchhuak a, hmun dang leh boruak tharah theihtawp ka chhuah a hun ve ta.”
“Ka thinlungah Manchester hi a cham reng tawh dawn a, Manchester in min duang tawh a, min kiansan ngai tawh lovang.”
2011 a Atletico Madrid atanga Manchester United zawmtu De Gea hian Old Trafford a kum 12 a cham chhungin Premier League 1, Europa League 1, FA Cup 1, League Cup 2 leh Community Shield 3 te a chawi a, Premier League golden glove award 2 a dawng bawk.
