Tottenham Hotspur laka an tlawm hnuin Manchester City boss Pep Guardiola chuan champion lam ngaituah thei an nih loh thu a sawi a, Conte nau te a fak mawlh mawlh bawk.
Premier League inkhelah Spurs chuan an khelmual Tottenham Hotspur Stadium ah Harry Kane goal khat hmangin champion lai Manchester City an tukdawl a, point 3 hlu tak an hlawhchhuak.
City laka goal khat khungtu Kane chuan Tottenham Hotspur tana goal khung tam ber record a siam ta chiah a, a team te hnehna a chanpui bawk nen, a tana zan chhinchhiahtlak tak a ni chiang e.
Spurs laka an tlawm hnuin Pep Guardiola chuan an game khelh chungchang leh tuna an dinhmun a sawichhuak. “Inkhel bul kan tan tha hle a, Spurs laka kan tihdan pangngai a ni. Amaherawhchu tihsual kan neih zeuh avangin hrem kan tawk. 1-0 a nih hnuin chance nei ve bawk mah ila game a danglam tawh. Ball kan inpekkual na lamah kan hloh chân a awm a, kan khingpuite’n Son leh Kulisevski te an kawl avangin thil a harsa zual hle. Point 3 kan hloh ta nge nge a ni.”
“Tun dinhmunah chuan champion lam ngaituah thei kan ni lova, kan rilru ah kan game khelh leh tur chiah in hmun a chang. Aston Villa kan hmachhawn dawn a, inbuatsaihna tha tak nen a tha thei ang bera chetchhuah kan tum ang.”
“Tottenham hian squad leh team tha tak an nei a, hremna pe thei reng tu che anni. An hmatawng lam that zia kan hria a, ball inpekkual leh set pieces ah te an tha hle, chuvangin fak an phû ngawih ngawih e. “
City hian Tottenham Hotspur stadium a an game khelh hnuhnung match nga ah an tlawm fai vek a, goal 7 lai chhuahin goal khat mah an khung ve lo thung. Champion lai City hian game khata khel tam chungin a chung bera awm Arsenal chu point 5 in an phâk lo mêk a, league title humhim an duh chuan chetsual leh a pawi thui tawh ang.