Tuchel an a ruk a rala Kane a lo biak avangin Daniel Levy a thinrim hle

Bayern Munich manager Thomas Tuchel an Tottenham Hotspur phalna la hmasa lova a ruk a rala Harry Kane a lo biak avangin Spurs chairman Daniel Levy a lawm lo hle nia report a ni.

German coach Tuchel an May thla daih tawh khan Kane hi lo bia a, anmahni rawn zawm turin an sawm. German coach hian Spurs striker hnenah Bundelisga title leh UEFA Champions League te a chawipui tur thu a hrilh a, a career a trophy la chawi lo Kane pawhin Tuchel sawmna hi a pawm nghe nghe.

Bayern boss Tuchel an Kane chu mimal taka bia a, transfer chungchangah inremna a lo neih fel pui than tawh avangin Spurs chairman Daniel Levy a lawm lo hle a, Tuchel thiltih dan hi a dem hle niin BILD chuan a tarlang.

Ni tam lo liamta mai khan Bayern in Kane hi official takin an dawr, kum 29 a upa leh club a season khat bak contract nei tawh lo striker manah hian bid hmasa ber €70 million an offer. Bayern lam atanga Kane lei dilna hmasa ber hi rin lawk ang ngei in Spurs chuan an lo hnawl a, North London club hian an striker chhuanvawr manah €117 million an beisei.

Real Madrid leh Manchester United te pawh in Spurs tana goal khung tam ber hi an beisei ve hman zet naa a transfer fee a an phut tam lulai êm avangin an hawisan leh tawh. Los Blancos hian Spanish striker kum 33 mi Joselu chu loan in an hawh a, kuminah emaw nakkumah Kylian Mbappe an sign ngei in a rinawm bawk. Hetih mek lai hian Manchester United lam pawh in striker la naupang lam an ngaihven a, chung zingah chuan Atalanta striker Rasmus Hojlund, Benfica star Goncalo Ramos leh Frankfurt forward Randal Kolo Muani te pawh an tel.

England captain hian Premier League ah goal 213 a khung tawh a, Premier League history a goal khung tam ber Alan Shearer record (260 goals) khum turin goal tam tak a mamawh tawh lem lo.

error: Content is protected !!