Tun thla ral hmain Manchester United star Jesse Lingard chu Premiere League team dang tan a khel thut thei niin report in a tarlang.
Daily Telegraph atang Luke Thomas sawi dawn chuan, Red Devils lam hian kum 29 a upa Jesse Lingard hi January transfer chhung ngeia hralh chhuah an tum dawn niin a sawi a, Newcastle United atang offer pawh a hmu tha viau niin a sawi bawk.
Jesse Lingard hian Red Devils lamah thla 6 vel chiah contract a nei tawh a, Manchester United tan £12 million vel chauh Lingard hralh chhuah nan hian a tawk a ni.
Tunkar tir lamah khan Man United chuan Magpies lam atanga offer an hmuh chu an lo hnawl sak a, chu an offer hmuh chu Newcastle lam hian Lingard hi loan-a lak hmasak a, a hnuah a ngheta lak luh an tum a ni.
January transfer-ah hian Necastle United lam hian active hle a, Atletico Madrid atang Kieran Trippier an lak luh mai bakah Burnley atang Chris Wood an la lut tawh bawk. Premiere League lama din chhuah zel an duh chuan, player dang pawh an lak luh nual rih a rinawm.
Season hmasa January transfer lai khan West Ham United chuan Lingard hi loan in an la lut a, a che tha ang reng hle. Premiere League season a tawp meuh chuan Premiere League goal 9 a khung mai bakah assist vawi 5 a nei tling. Newcastle United lam hian la lut ta se, an ti fuh viau lovang maw?
Source SL