Transfer chungchangah Chelsea in Dybala agent an be pawp

Transfer chungchangah Paulo Dybala agent chu Chelsea hotu lamin an be pawp tih report chuan a tarlang a, nikum nipui bazar laia free agent a Juventus atanga AS Roma zawmtu Argentine attacker hi kuminah pawh sawi a hlawh leh tan mek.

Chelsea head coach thar Mauricio Pochettino chuan a hnampuipa Dybala hi a team a khel tur atan a awt hle a, Chelsea hotute chu sign turin hrilh.

Kum 29 a upa Roma forward hian release clause €20 million vel bak a nei lova, amaherawhchu heihi Serie-A nilo league dang club a zawm chauh in a ni thung.

Blues in kuminah first team player 6 lai mai hralhna atangin £200 million aia tam an chawlut tawh a, player thar lakluh nan an la inseng tam lo nen, Dybala lakluh hi an tana thil harsa a ni dawn hauh lo.

Blues in season tharah European competition an khel dawn lo tih chu a chiang a, amaherawhchu Dybala hi hlawh tam tak an offer theih dawn avangin Juventus star hlui hian Chelsea sawmna a pawm lo ang tih a sawi theihloh.

Chelsea lamin an duhna lantir mahse Roma lamin erawh an star player hi la kawl zel an duh a, Dybala pawh hian Roma tan kum 2025 thleng contract a la nei bawk.

2022/23 season kha Roma tana Dybala season hmasa ber ni mahse Portuguese coach Jose Mourinho hnuaia player pawimawh a ni a, a team tan inelna hrang hranga game 38 a inlan atangin goal 18 leh assist vawi 7 a thawkchhuak.