Liverpool manager Jurgen Klopp chuan transfer bazar inkhar hma ngei a midfielder thar lâkluh a la tum thu a sawi.
Reds hian kuminah free transfer in an midfielder pathum Naby Keita, Alex Oxlade Chamberlain leh James Milner te an chhuah a, an hmunruak hnawhkhat turin Alexis MacAllister leh Dominik Szoboszlai te an lalut.
Merseyside club hian midfielder thar pahnih lâkluh nan £100 million dawn insêng in an midfield lai an thawmtha thawkhat hle. Amaherawhchu Saudi lam an rawn che a, Al Ettifaq leh Al Ittihad te chuan Reds midfielder pahnih Jordan Henderson leh Fabinho te lâkluh tumin tan an la mêk a, mimal inremna an neihpui tawh avangin an in lalut thuai in a rinawm bawk.
Hetiang anih tâkah chuan Reds in midfielder thar an lâkluh ngei a ngai a, head coach Jurgen Klopp pawhin transfer window inkar hmaa player thar an lâkluh tur thu a sawi.
Klopp chuan,”Tuna ka tum ber leh rilru sênna ber chu training session lam a ni tur a ni a, chu chu tuna ka tih mêk pawh a ni. Bazar nan hun kan la nei a, training session a kan hun hman dan a zirin kan mamawh chu kan hre thei ang. Season thara kan game hmasa ber khelh hma in kar 3 emaw 4 vel hun kan la nei a, chumi hma chuan thil thenkhat a thlen a la ngai. Transfer bazara thil kal dan ang pawha kan inher rem a ngai mahna. Transfer a la thleng dawn a, team tha tak kan nei ang” a ti.
Henderson leh Fabinho te an chhuah dawn tâkah chuan Liverpool in midfielder thar an ngaihven leh tan a, tun dinhmunah Crystal Palace midfielder Cheick Doucoure, Brighton star Moses Caicedo leh Southampton rawlthar Romeo Lavia te chu Reds nena sawizawm mêk midfielder te anni.
Jurgen Klopp leh a nau te hian an pre season game leh ah German club Greuther Furth an hmachhawn ang.