Tottenham Hotspur neitu Joe Lewis chuan nakkumah a thlawna Harry Kane chân a duh lova, contract thar a ziah duh loh chuan club chairman Daniel Levy hnenah hralhchhuak mai turin a hrilh.
England captain hian Spurs ah season khat daih bak contract a nei tawh lova, contract thar ziahtir ngei tumin Spurs hotute’n tan la an mêk. Tottenham chuan an striker in contract thar a ziah phawt chuan karkhatah £4,00,000 hlawh pêk an inhuam a, inkhelh a chawlhsan hunah club-a hna pêk an intiam bawk nia sawi a ni.
Club lamin chelhbeh tumin theihtawp chhuah mahse a player ber hian trophy a chawi ngei theihna tur nia a ngaih club dang zawm a duh tawh a, an contract thar offer pawh tun thlengin a la hnâwl zel.
Kane hian mimal thilah Bayern Munich chu inremna a neih fel pui tawh a, German champion pawhin Kane lâkluh tumin tan an khawh mêk. Bundesliga club ropui hian kum 29 a upa lâkluh tumin bid vawi hnih an theh lut tawh a, mahse hnâwl ve ve a la ni. A vawi thumna theh luh leh tumin an inbuatsaih mêk a, €100 million a kai chho tawh tura ngaih a ni.
Transfer bazar inkhar hmaa ni engemaw zah a la awm avangin Kane hralhchhuah kawngah Spurs Chairman Daniel Levy a hmanhmawh vut vut lova, an striker hi contract thar ziahpui ngei tuma tan an lâk hnu pawha an hmin theih ngang loh anih chauh in transfer window inkhar dawnah a to thei ang berin an hralhchhuak ang.
Daniel Levy an Kane mana an sum phut la sawi chiang lo mahse kum 29 a upa manah hian €100 million vel an beisei dawn nia report a ni a, kum tam tak hnuah England captain hian North London club a chhuahsan thei dawn ta niin a lang.