Harry Kane in Bayern Munich leh Paris Saint Germain te sawmna hnawla Tottenham Hotspur ah a la cham chhunzawm zel anih chuan inkhelh a chawlhsan hunah club in hna an pe dawn.
Daily Mail tarlan danin Kane hian contract thar a ziah chuan karkhatah £4,00,000 a hlawh dawn bakah inkhelh a chawlhsan hunah club ah hna pêk a ni dawn. Spurs striker hian club ah 2023-24 season thleng bak contract a nei tawh lova, Europe club lian dangte nena sawizawm mêk annih avangin a hma hun zel tur a chiang lo hle.
Bundesliga champion Bayern Munich chuan Kane lâkluh nan bid vawi hnih lai an theh lut tawh a, mahse hnawl ve ve a ni. Ligue 1 champion Paris Saint Germain lam pawhin England captain hi an duh a, indawrna an kalpui tan dawn.
Spurs chairman Daniel Levy chuan Kane manah hian £120 million a phut nia sawi a ni a, hetiang zata tam sum hi kum 29 a upa leh season khat bak contract nei tawh lo player manah club lian dangte hian an theh chhuak ngam in a rinawm loh.
Spurs chuan an striker hi club ah a la cham chhunzawm zel an beisei a, club lian dangte sawmna hnawla contract thar a ziah chuan sum tam tak a hlawh dawn bakah inkhelh a chawlhsan hunah Tottenham ah ngei coaching career a tan thei ang.
Club lian dang nena sawizawm annih karah Kane pawhin pre season training nei turin Tottenham ah a kir leh tawh a, Spurs hian an game hmasa ber tur atan karleh khian Australia ah West Ham United an hmachhawn ang.