Tun season a beisei pha lo Chelsea chuan top 4 huanga season khar an tum thu Spanish defender Marc Cucurella chuan a sawichhuak.
Todd Boehly an Chelsea a lei fel hnuin player thar lakluh nan Blues in £600 million chuang an inseng tawh a, January transfer bazar liamta chhung ringawt khan £300 million dawn an thehchhuak bawk.
Player tha chawlut nual mahse Graham Potter hnuaiah Chelsea an harhchhuak hleithei lova, league game 23 an khelh tawh atanga point 31 chauh la hlawhchhuakin table ah 10-na anni mek.
Brighton atanga £60 million a Chelsea zawmtu Cucurella erawhin top 4 beiseina a la tawp loh thu leh season thara Champions League khelh an tum thu a sawichhuak.
Spanish defender chuan,”He club ah hian thil tam tak a inthlak danglam a, player thar thahnem tak an lo lut bawk, chuvangin engkim mai hi a la harsa em em vek a ni. Tun season hi he club tana hun thar intanna anih ka ring a, kan tan chuan season leh a Champions League khelh hi a pawimawh hle.”
”Season chawhma lam kan hmang tha lutuk lova, chhuanlam tur erawh kan nei lo. Ngawrh taka training kan neih a ngai a, game tina hnehna chan leh top 4 huanga season khar ngei kan tum tur a ni” a ti.
‘Chelsea forward zingah hian tunge tawhkhirh ber ang?’ tia an zawhna Cucurella chuan chhang leh in,”Mydryk hi anih ka ring, a tlanchakin skills a nei tha em em a, player tha tak zawng a ni. Tun atanga kum reilote hnuah khawvela a tha ber te zinga tel thei turin theihna a nei. A inzir chhunzawm zel a tul a, he club ah hian hlim taka a awm a ngai bawk.”
Chelsea hian an game leh ah Tottenham Hotspur an luhkhung dawn a, league table 4-na a awm mek Conte leh a nau te laka point hlawhchhuah hi thil awl ai a ni dawn lo. Tun season ah Blues hian league game 15 khelh tur an la nei a, top 4 huanga season khar an tum takzet anih chuan chet chhiat a hun tawh lo.