Top 4 huanga season an khar avangin Man Utd tan Maguire hralhchhuah a harsa zual!

Manchester United in top 4 huanga season an khar avangin an defender Harry Maguire hralhchhuah an harsat leh zual a, a chhan pawh English defender hlawh hi a pun vang niin report chuan a tarlang.

Guardian tarlan danin Man Utd in UCL khel tura an inpettlin leh chiah khan team captain Harry Maguire hlawh a pun belh sawt a, hei hian club dang tan pawh defender hlawh tam Maguire dawr an tîm phah sawt.

Kum 30 a upa hian Old Trafford ah kartin £2,00,000 a hlawh a, a hlawh hi engzah chiah in nge a punbelh tarlan nilo mahse tuna a karkhat hlawh zat pawh hi club lian lo tan chuan buaina tham a tling lutuk tawh.

A player berin club chhuahsan tumna a neih ngawt loh chuan nawr luih a harsa em em a, chutihrualin Maguire hian England tana hmun chang chho zel tur chuan season hmasa anga bench luah lum fo mai kha a finthlak hauh lovang le.

Ten Hag an goalkeeper bakah striker thar lakluh a duh avangin club in player hralhna atangin sum engemaw zah an hailuh ngei ngei a ngai. Red Devils hian tum dang ang lo takin kumin chu transfer budget an nei tam lova, player thar lakluh nan £100 million bak hman tur an nei lo nia report a ni.

Chelsea atangin Mason Mount chuan £55 million + £5 million add ons in Man Utd a zawm fel tawh a, hetiang anih chuan Man Utd in player thar sign nana an la neih zawng chu £45 million a ni.

Striker leh goalkeeper thar lakluh la tum Man Utd tan £45 million chauh chu a beitham lutuk a, an player kawllai thenkhat hralhna atanga sum engemaw zah an hailuh ngei a ngai ang.

Tun dinhmunah Fred, Scott McTominay, Jadon Sancho, Harry Maguire, Anthony Martial leh Mason Greenwood te man neia club chhuahsan thut thei te anni.

Man Utd hian David De Gea thlaktu turin Inter Milan goalkeeper Andre Onana an dawr mek a, kum 27 a upa manah hian Red Devils chuan bid hmasa ber £39 million theh lut mahse hnawl a ni. Inter lam hian an goalkeeper manah £45 – £55 million vel an beisei.

Ten Hag an Wout Weghorst kawl chhunzawm zel a tum loh hnuin striker thar lakluh ngei a duh dawn a, tun dinhmunah Rasmus Hojlund chu Man Utd striker lakluh tum ber a ni mêk. Kum 20 a upa manah hian Atalanta chuan £40 million vel an phut nia sawi a ni bawk.