Germany in 4-2 a Portugal an hneh hnu khan Cristiano Ronaldo leh Toni Kroos chu field chhungah inbia in thil an sawi dun a, heta an sawi dun hi Toni Kroos chuan a sawi chhuak.
Real Madrid lama inteammate pahnih inbiakna hi camera lam chuan an chik hle a, an focus zeuh zeuh. Portugal defender Pepe pawh Toni Kroos lam rawn panin a lawmpui ve bawk.
Group F match khelh zawh a nih ruala C Ronaldo nena an inbiakna chu Toni Kroos chuan sawi chhuakin, tournament chungchang leh Italy lama Ronaldo a khelh chungchang an sawi dun niin a sawi.
“Cristiano Ronaldo nen hian season 4 chhung kan khel dun tawh a, ka uar miah lo, amah vang chauhvin hlawhtlinna ropui tak ka chang, a chungah ka lawm hle.” tiin Toni Kroos chuan Einfach mal Luppen podcast-ah Ronaldo nena an titi chungchang an zawhna chhangin a sawi niin Sun Sport chuan a tarlang.
“Season 4 kan khelh dun chhung zawng zawng khan dressing room lamah pawh bul hnaia awm reng kan ni. Kan inhmuh lohna a rei tawh em em a, a chhuah hnuah Real Madrid in Juventus a hmachhawn rih lo a ni.”
“Kan sawi ber pakhat chu match khelh leh tur chungchang a ni a, duhsakna ka hlan, keini ang thovin next round an thlen theih ka beisei pui.”
“Italy lam nuam a ti nge ti lo tih te ka zawt a, a chhan chu Italy-ah hian kum 3 lai mai hun a hmang tawh.” tiin a sawi.
Real Madrid in kum 2016 atanga 2018 thleng UEFA Champions League nomawi a zawna vawi 3 an chawi tumah pawh khan Toni Kroos leh C Ronaldo hi an pawimawh hle a nih kha.
A nihna takah chuan video-ah khan kawr (jersey) an inthleng lai a lang lova, mahse, Changing room lamah erawh kawr an inthleng a ni.
“Game khelh zawh tawh hi chuan inhmuh leh te a harsa tawh hle. Dressing room lamah kawr kan inthleng a ni. Amah chu hmuh leh ngei ka duh.” tiin a sawi bawk.
Source SB