Arsenal player thar ber Jurrien Timber chuan a khelh theihna tur position hrang hrang pathum a sawi a, Mikel Arteta hnuaiah player pawimawh tak rawn nih chho ngei a tum.
Dutch international hi right back a khel thin a ni tih chu kan hre deuh fur âwm e, chutihrualin position dang pahniha khelh theihna a la nei cheu a, heng position dang pahnih ah te pawh hian a khel ve zeuh thin bawk.
Arsenal club media in an kawmna ah a position khelh duhna ber an zawt a, Timber chuan hetiang hian a chhang, “Ka tan chuan khawi position nge tih lam a pawimawh lem lo. Vanneihthlâk taka ka sawi theih chu centre back ah ka khel thei a, right back ang pawhin. Tin, a châng chuan midfield ah te pawh a ni bawk. Chuvang chuan hmun hrang hranga ka khelh thiamna hi tha ka ti a, vawnnung zel pawh ka duh” a ti.
Kum 22 a upa hian Ajax leh Arsenal te khelhdan chu a inan viau thu sawi leh in, “Arsenal khelhdan hmang hi ka duh em em a, Ajax lama kan khelhdan nen a inang thawkhat hle. A hnung atanga khelh chhoh hi ka duh dan a ni. Arsenal leh Ajax te khelhdan ah hian inanna nasa tak ka hmu.”
Timber hian €40 million + €5 million add ons in Arsenal a zawm a, kumina Arsenal player lâkluh thar pahnihna a ni. Declan Rice chu Arsenal player lâkluh thar pathumna tur a ni dawn a, West Ham United captain manah hian Gunners chuan £105 million an theh chhuak.
Timber hian season hmasa khan Ajax tan inelna hrang hrangah game 46 a inlan a, goal 2 leh assist vawi 2 thawkchhuakin Ajax player rinrawl ber te zinga mi a ni. Timber an Emirates Stadium lam a pan hi Ajax tana chânna anih laiin Arsenal tan chuan hlawkna anih ngei a rinawm.