Kerek hliam avanga thla 4 meuh a chawlh hnuin Brazilian star Neymar chuan training a zawm ve leh thei ta a, nimin lam khan pre season training nei Paris Saint Germain team ah a tel.
Brazilian international hian season hmasa khan PSG tan season chanve chhung tha tak in a hmang a, inelna hrang hrangah goal 18 leh assist vawi 17 a thawkchhuak. Amaherawhchu vanduaithlak takin season chawhnu lam February ni 19 a 4-3 a Lille an hneh tumin a inhliam a, 2022/23 season zawh hma hauh in a chawlh a ngai.
A kerek hliam te zai fel in hun engemaw chen enkawl anih hnuah Neymar an training a zawm leh tawh a, chutihrualin hliam damkawr anih vang leh a fit tawk loh avangin training session hautak tak neihpui a la nilo.
France chanchinbu lar L’Equipe chuan nimin lam khan PSG player tam zawk in pre season inbuatsaih nana training session hmasa ber an neih thu a tarlang a, player lo kir zingah hian Neymar pawh a tel ve nghe nghe bawk.
Kum 31 a upa hian season thar lo thleng turah chak zawka lo kir a duh ngei dawn a, manager a lo hrawn tawh Spanish coach Luis Enrique hnuaiah a rawn khel tha chho viau in a rinawm a ni.
2014/15 season a Luis Enrique hona hnuaia Barcelona an treble tum khan Neymar hi Barca player pawimawh ber te zinga mi a ni a, a club hlui tan inelna hrang hranga game 54 a inlan atangin goal 42 leh assist vawi 18 a thawkchhuak a ni.
