Juventus legend Giorgio Chiellini chuan Chelsea defender Thiago Silva chu kum li dang la inkhelh thei tur anih thu a sawichhuak.
Tun season ah Chelsea in beisei an pha lo em em a, chutihrualin an centre back kum 38 a upa Thiago Silva erawh a tangkai dan a la ngai reng tih theih tur a ni. Blues in an game hnuhnung bera Tottenham Hotspur an ngam loh tumin Silva hi hliam avanga lakchhuak a ni a, Graham Potter lu tihai zual tu a ni ngei ang.
Juventus leh Italy legend tuna Major League Soccer Club Los Angeles FC tana khel mek Chiellini chuan Silva chungchang hetiang hian a sawichhuak, ”Thiago hi player danglam bik tak a ni. Ni e han khelhthat chan hi chu a awm a lawm, amaherawhchu top level a hun rei tak chhung a inkhel thei hian ka mak tih a hlawh takzet. A that em vang pawh a nilo, kei aiin a upa a, game tina a inlan thei mai zel hi thil awl ai tak a ni hauh lo a ni.”
Kum 38 a upa chuan sawi chhunzawmin, ”A vannei a tul in ka hria a, a inhliam nat loh hram hi a pawimawh. Kum 35 ka nih laia ka khup hliam avang khan ngai ka awh leh thei ta lova, ka taksa dinhmun a inthlak chiang hle. Ka inhliam hnu khan engkim mai hi a harsa zual a, Thiago Silva erawh tun anga a kal chho bek bek chuan kum 41/42 thlenga la inkhel thei tur a ni1″ a ti.
Kum 38 a upa Silva hian tun season ah Blues tan game 27 (all competition) a inlan tawh a, a kum lam uaithla ve deuh tawh mahse team tan a la tangkai vet vet hle. Spurs an hmachhawn tuma a inhliam avangin kar ruk vel chhung a chawlh a rinawm a, team talbuai mek Chelsea tan hun engemaw chen an hruaitu awm lo tur hi a manganthlak hle ang le.
An game hnuhnung 11 a vawikhat chiah hnehna chang Chelsea hian tun Inrinni zan dar 8:30 ah an khelmual Stamford Bridge ah Leeds United an lo hmachhawn dawn a, hnehna chan a point 3 hlawhchhuah ngei an tum dawn a ni.
