UEFA Champions League Round of 16 first leg ah PSG tlawm mahse an forward Kylian Mbappe chuan 2nd leg ah beisei tur an la neih thu leh an tang tak tak anih chuan Bayern Munich tana team tawrhhlelhawm tak an nih thu a sawi.
PSG in an khelmual Parc des Princes ah Bayern Munich an lo mikhual a, mikhual lam hian Kingsley Coman a goal khat hmangin hnehna an chang a, Munich ah goal khat nei sa in France champion an lo mikhual ve ang.
Nizan inkhelah PSG tan hliam damkawr Mbappe an inkhelh bul a tan lova, 2nd half minute tirlama dah luh erawh a ni. France forward luh hnu hian PSG in an khingpuite an nawr na sawt a, Mbappe hian goal 2 khung mahse offside vanga pawm loh a ni.
An khelmualah tlawm zawk ni mahse PSG atangin beisei tur a la awm a, an dam tha a, an inbuatsaihna a that phawt chuan Munich ah Bayern tan harsatna an thlen thei ngei dawn niin Mbappe chuan a ngai.
”Ni e a tlawm zawk ah kan tang ngei mai amaherawhchu game tawp lam kha kan thlir anih chuan Bayern tan buaina kan thlen nasa hle. Qualify turin Munich lam kan pan dawn a, chhun leh zan thlengin kan inbuatsaih ang. 2nd leg tur atan kan player te an dam that a ngai a, player zawng zawng te’n kan ei leh in mai bakah zana mut that a pawimawh ang. Theihtawp chhuaha kan han nawr meuh kha chuan Bayern lam kha an hahdam hman hlawl lo anih kha” tiin inkhelh banah Mbappe chuan a sawi.
2nd leg hi March ni 9 zinglam dar 1;00 a khelh a ni dawn a, PSG lam hi an dam tha a, an that dan bera an inrem anih ngat chuan Bayern tan an huphurhawm dawn a, inkhel hmuhnawm tak an chhawpchhuak ngei ang. Chutihrualin Bayern Munich that zia kan hre vek a, Munich ah lehnghal, an zâm dawn bîk hauh lo.
