Manchester United chuan Newcastle United chu sihnih faia hnehin EFL Carabao Cup an chawi a, Dutch manager Erik Ten Hag hnuaia Red Devils trophy chawi hmasak ber a ni.
Nizan Carabao Cup final match inkhelah Man Utd tan Casemiro chuan goal khat a khung a, Newcastle United defender Sven Botman chuan an mahni lamah a ti lut bawk.
Ten Hag hnuaia Manchester United hma sawn zia kan sawi a, nomawi hmangin an lantir chiah bawk. Europa League atanga Barcelona an petchhuah hnuah Magpies hnehin EFL Carabao Cup an chawi zui anih hi.
Jose Mourinho hova 2017 a Europa League an chawi hnuin Man Utd in trophy dang an la chawi leh miah lova, nizan khan hun rei tak chhung an lo nghah tawh chu tihpuitlin a awm in Carabao Cup an chawi leh ta.
Red Devils hian season kal mêk ah trophy dang pathum beisei tur an la nei cheu a, Premier League table ah pathumna niin FA Cup leh Europa League lamah pawh an la tling zel e.
Man Utd tan Brazilian midfielder Casemiro a tangkai hle a, a game hnuhnung 12 atanga goal 4 khung tawhin EFL Carabao Cup final a Brazilian player goal khung thei pathumna a ni chiah bawk. A hma lamin Philippe Coutinho leh Fernandinho te’n an lo khung tawh.
Ti hian Manchester United in League Cup 6 an chawi tawh a, anni aia chawi tam zawk chu Manchester City (8) leh Liverpool (9) te anni.
Carabao Cup final a tlawm zawk Newcastle United hian an game leh ah Manchester City chu league ah an hmachhawn dawn a, Cup chawi hlim Manchester United game leh tur erawh FA Cup 5th round niin West Ham United an hmachhawn ang.