Manchester United manager Erik Ten Hag chuan Harry Maguire captain nihna a hlip a, captain thar a ruat thuai ang.
Maguire hi a lungni lo hle nghe nghe a, Twitter lamah team a captain nihna Ten Hag an a hlîh thlâk chungchangah hetiang hian thu a thlah, “Ka captain nihna a(Ten Hag) hlih thlâk chhan te min hrilhfiah a, mimal takin ka lungni lo hle. Engpawhnise he kawr ka hâk chhung chuan theihtawp ka chhuah chhunzawm ang.”
“Hetiang hi ka dinhmun anih tâkah chuan captain armband ka hrên chhunga Manchester United fans min thlawp thintute zawng zawng chunga lawmthu ka sawi duh e” a ti.
January ni 17, 2020 khan Ole Gunnar Solskjaer chuan Maguire hi Man Utd captain atan a ruat a, kum 3 leh a chanve chhung zet Man Utd captian anih hnuin a captain nihna hlihsak a ni.
Ten Hag hnuaiah English defender hi a tlatlum lo em em a, season hmasa khan league game 8 ah chiah inkhelh bul a tan.
Harry Maguire hi tun nipui bazara Man Utd chhuahsan thut thei a ni a, West Ham chuan £80 million man defender hi loan a hawh an rilrûk mêk.
Hetih mêk lai hian Ten Hag chuan Man Utd captain thar tur a ruat thuai dawn a, tun dinhmunah Bruno Fernandes emaw Raphaël Varane te chu Red Devils captain thar tura rinkai ber te anni.