Manchester United in sihnih faia Leeds United an hneh hnuin he match a goal hmasa zawk khungtu Marcus Rashford chu manager Erik Ten Hag an inkhelh banah a fak hle.
Nizan Premier League inkhelah Manchester United leh Leeds United te chu Elland Road ah an innuai a, Red Devils lam tan Rashford leh Garnacho te chuan goal khat ve ve khungin an team chu point 3 hlu tak an hlawhchhuah pui. 2-0 in match hi a tawp a ni.
Ten Hag leh a nau te hian tun season ah league game 23 an khelh atangin point 46 an hmu tawh a, table ah 3-na anni mêk. An game leh ah Barcelona chu Europa League round of 16 play off first leg ah an hmachhawn dawn a, hemi zawh hian league ah Leicester City an hmachhawn ang.
Leeds laka goal khat khungtu kum 25 mi Rashford hian tun season ah goal 21 (all competition atangin) a khung tawh a, season a hman that ber tuma a goal khung zat (22 goals) khum turin goal 2 bak a mamawh tawh lo.
Red Devils boss Erik Ten Hag chuan tun season a form em em mai Rashford chu Leeds laka hnehna an chan hnuin hetiang hian a fak,” Skills sang tak a nei a, ka enkawl tir phat atang khan a theihna hi ka hrechiang in thawhpui ka châk hle a, a lak atang hian thil tha tam zawk hmu ka beisei tlat a ni.”
“A skills leh a theihna neih te hi a sang lua a, amaherawhchu tun aia la ropui thei a ni. A thawhrim phawt chuan goal tam zawk la khung thei tur a ni a, a chhan pawh a ke dinglam, veilam leh lu thlenga a hman thiam vang a ni.”.
“Season tantir khan hei hi ka hrilh a, game tina goal chance a neih tur leh goal khung tura theihna a neih thu te a ni. Minute 90-95 thleng inkhel ah rilru pe turin ka duh a, chutiang a ti thei anih phawt chuan a ke dinglam, veilam leh lu hmang te in a khung thei tih in hria ang” a ti.