Ten Hag an £220 million hmang tawh mahse club hotute’n transfer bazar ah la thlawp zel dawn

Tun nipui transfer bazar liamta khan Erik Ten Hag an player thar lakluh nan £220 million lai hmang tawh mahse transfer bazar inhawn leh hunah Manchester United chuan an manager hi an la thlawp chhunzawm dawn.

Antony, Casemiro, Lisandro Martinez, Christian Eriksen, Tyrell Malacia leh Martin Dubravka te’n Old Trafford pan tawh mahse Man Utd Director of Football John Murtough an squad thawmthat nan Ten Hag hnena sum pek an inhuam.

”Erik Ten Hag kan la thlawp zel dawn a, hlawhtlinna kan chan theih nana player tha leh rintlak a chawkluh zel theihnan transfer bazar ah sum pek kan inhuam. Chutihrualin kan sum lakluh dan leh dinhmun erawh a that chho zel a ngai. Kan tum anga thil kan ti thei anih chuan transfer bazar khata player lakluh teuh teuh kan rilruk lova, tin thlasik bazar ai chuan nipui bazar lamah tan kan la zawk ang” tiin Man Utd Director of Football John Murtough an transfer bazar a an manager Ten Hag an thlawp zel tur thu a sawi.

Murtough chuan sawi chhunzawmin,” Nipui bazar liamta khan first team squad tan sum kan seng nasa em em a, inkhel bul tan thei ziah tur player thar 5 vel lakluh kan nei. Player tawnhriat ngah kan lakluh mai bakah player la naupang lam, hma hun eng tak nei te pawh lak lalut ve bawk. Tin, player chhuak an awm ve nual a, 2021-22 season kan hman thatloh hnua squad kan siamtha thei hi a lawmawm hle” a ti.

Man Utd hian tun season kal mek ah league game 6 khel tawhin point 12 an hlawhchhuak tawh a, table ah 5-na dinhmun an luah mek. An chunga awm pali zinga pathum te hi an aia game khata khel tam theuh anni.

Related Posts

error: Content is protected !!