Striker thar sign an tum leh tum loh chungchangah Chelsea boss thar Mauricio Pochettino chuan a ngaihdan a sawi a, forward thar lakluhna hun an la neih thu leh pre season a thil thlen dan atanga te a thutlukna an siam tur thu a sawi.
Chelsea hian false 9 a an chhawr thin Kai Havertz chu Arsenal lamah an hralh fel tawh a, tun dinhmunah striker kawllai Pierre Emerick Aubameyang , Romelu Lukaku leh RB Leipzig atanga an lak thar Christopher Nkunku te an kawl mek.
Lukaku hian season hmasa-a loan-a a khelhna Inter Milam lamah kir leh a duh a, a transfer chungchangah Blues leh Inter te pawhin inbiakna an kalpui mek. Hetih mek hian Aubameyang pawh Saudi lam nena sawizawm anni ve bawk a, kum 34 a upa hian season hmasa khan Blues tan league game 15 a inlan atangin goal 1 chiah a khung!
Aubameyang hi Pochettino chuan rinrawl atana a chhawr a rinawm lova, kumin nipui bazarah club a chhuahsan a rinawm bawk. Lukaku lah Chelsea a beisei phak loh leh Inter Milan tana khelh leh chak ngawih ngawih a ni a, hetiang anih chuan Blues hian an striker kawllai pahnih chan thei niin Nkunku chiah a bang dawn a, striker thar an mamawhna hi a sang viau maithei.
Reporter in ‘striker thar sign i tum em?’ tia a zawhna Pochettino chuan chhangin, “Kan hre chho zel ang chu, thil thlen dan leh kan dinhmun a zir te pawhin a ni ang. Hma kan la mek a, kan hriat tura ka duh erawh chu football hi a danglam zung zung a, vawiin a kan neih te hi naktuk ah chuan an bo leh duak mai thin. Forward kan mamawh belh em ka hre lova, inring renga kan awm erawh a ngai. Anih loh pawhin pre season kan tan anga, eng position te nge thawmthat ngai tih leh forward goal khung thei sign belh kan mamawh em tih te pawh kan hre chawp zel ang chu. Thil hi a inthlak zut zut a, chuvang chuan a inthlak danglam dan mil zela kan inherrem ve mai a ngai.”
Pochettino hian Spurs lama a lo enkawl tawh Kane chungchanga reporter te zawhna chhang leh in, “Club dang player a ni a, a chungchang han sawi chiam thei ka nilo. Amaherawhchu Kane chungchang kan sawi anih chuan khawvela striker ropui ber te zinga mi chanchin kan sawi tihna a ni. Club dang player a ni a, kan inkungkaihna erawh engtik lai pawhin a tha” a ti.
