Goal khung harsat tak Chelsea chuan an buaina sukiang turin nipui transfer bazar inhawn hunah Juventus striker Dusan Vlahovic lâkluh an tum dawn niin report chuan a tarlang.
Season kal mêk ah Blues hian league game 24 atangin goal 23 chiah an la khung a, Premier League club zînga goal khung tam lamah 14-na niin tuna top 11 ah goal khung tlem ber team anni bawk.
Graham Potter team hian number 9 pangngai tak an mamawh hle niin a lang a, loan a Inter Milan zawmtu Romelu Lukaku a lo kir tawh hmel loh bawk nen an hmatawng lam buaina sukiang turin Vlahovic lam an hawi.
Kum 23 a upa hian €70 million in January 2022 khan Turin khawpui a pan a, a season khatna ah erawh hliam in a tlakbuak nasat avangin Vlahovic hian Old Lady tan Serie A game 15 chauh a inlan thei a, goal 7 a khung a ni. Tun season ah erawh Vlahovic hian a team tan game 23 (all competition) a inlan atangin goal 10 leh assist vawi 4 a thawkchhuak tawh.
Juventus head coach Massimiliano Allegri chuan Serbia tana game 19 atanga goal 10 khung tawh Vlahovic hi la kawl chhunzawm zel a duh a, amaherawhchu sum lam buaina avangin club lamin an hralhchhuah a tul maithei.
Football Insider tarlan danin Chelsea chuan striker thar lâkluh an duh takzet a, lâkluh an tum pathum zînga pakhat chu Juventus striker Dusan Vlahovic hi a ni. A dang pahnihte chu AS Roma striker Tammy Abraham leh Napoli striker Victor Osimhen te anni bawk. Serie-A lama che pui tak Nigerian forward Osimhen hi Manchester United pawhin nipui transfer bazar inhawn hunah lâkluh an tum dawn.
